Ano ang mga Klase ng Assets: Pagtuklas sa mga Pinansyal na Investment | FXGT.com 

Marahil mukhang kumplikado ang pag-iinvest pero mas madali mo itong matatahak kapag naiintindihan mo ang iba’t-ibang klase ng assets. Ang mga klase ng asset ay kategorya ng investment na parehas na kumikilos sa market. Kapag nalaman mo ang iba’t-ibang kategorya na ito, makakagawa ka ng mas wais na desisyon sa pag-iinvest at makakabuo ng mas matatag na portfolio. Sa artikulong ito, aalamin natin ang iba’t-ibang klase ng assets, kung paano ito nakakatulong sa pag-diversify, kung ano ang dapat isaalang-alang kapag pumipili nito, at mga praktikal na paraan para mag-invest dito.

May iba’t-ibang anyo ang mga investment, na nag-aalok ng kanya-kanyang naiibang oportunidad:

Mga Equity (Stocks): Ang mga equity ay kumakatawan sa pagmamay-ari sa isang kumpanya. Kapag bumibili ka ng stocks, para ka ring bumibili ng bahagi ng naturang kumpanya. Kapana-panabik ang stocks dahil nakakapagbigay ito ng potensyal sa mas mataas na kita, pero pwede rin itong tumaas-baba. Bagay ito sa mga natutuwa kapag umaakyat at bumabagsak ang market, at sa mga naghahanap ng paglago. Alamin ang tungkol sa stocks dito.

Fixed Income (Bonds): Sa bonds, para kang nagpapahiram ng pera sa isang kaibigan pero may isang pormal na kasunduan. Nagpapahiram ka sa mga korporasyon o gobyerno, at babayaran ka nila ng interes sa loob ng napagkasunduang panahon. Ang bonds ay kadalasang may mas mababang risk kumpara sa stocks, at nagbibigay ito ng tuloy-tuloy na mapagkakakitaan. Bagay ito para sa mga naghahanap ng matatag na investment.

Real Estate: Ang pag-invest sa real estate ay tulad ng pagmamay-ari ng bahagi ng pisikal na mundo. Isa man itong paupahan o lupain, pwedeng makapagbigay ang real estate ng kita sa upa at potensyal na pagtaas ng halaga. Nahahawakan ito at kadalasang magandang panlaban sa inflation, kaya nakakapagbigay ito ng katatagan at pangmatagalang halaga.

Mga Alternatibong Investment: Ito ang kayamanan sa mundo ng investment, na punong-puno ng mga commodity, hedge funds, pribadong equity, pati na ng crypto. Ang mga ganitong investment ay kadalasang may sariling takbo, at nag-aalok ng benepisyo sa pag-diversify. Pwede ‘tong maging kumplikado at magtaglay ng mas mataas na risk, pero pwede rin itong makapagbigay ng potensyal sa mas mataas na kita.

Susi ang pag-diversify para bumaba ang risk sa iyong investment portfolio. Sa pamamagitan ng paghahati-hati ng investment mo sa iba’t-ibang klase ng assets, nasisigurado mo na hindi dumedepende masyado ang portfolio mo sa iisang klase ng investment. Kapag humina ang isang klase ng asset, maaaring tumaas naman ang iba, kaya babalansehin nito ang pangkalahatan mong kita. Halimbawa, kung bumagsak ang stock market, maaaring makapagbigay pa rin ng tuloy-tuloy na kita ang investment sa bonds o real estate. Ang ganitong istratehiya ay maaaring humantong sa mas tuloy-tuloy at matibay na paglago sa pangmatagalan.

Kritikal ang pagpili sa tamang timpla ng assets at dapat itong gabayan ng:

Kakayaning Risk: Maaaring kapana-panabik ang mga equity pero pwede itong tumaas-baba. Sa kabilang banda, ang bonds ay nakakapagbigay naman ng katatagan. Makakatulong sa pagpili ng tamang asset ang kakayanin mong lebel ng risk.

Tagal ng Investment: Mahalaga ang ilalaan mong oras. Nag-iinvest ka ba sa pangmatagalan o kailangan mo ng pera sa loob ng ilang taon? Para sa mga pangmatagalang investor, kakayanin nilang sakyan ang pagtaas-baba ng market, habang sa mga panandaliang investor, marahil mas bagay sa kanila ang assets na hindi masyadong tumataas-baba.

Pinansyal na Layunin: Bakit ka nag-iinvest? Dahil man ito sa pagreretiro, pagbili ng bahay, o pagpondo ng edukasyon, makakaimpluwensya ang mga layunin mo sa assets na dapat piliin.

Kondisyon ng Market: Tutukan ang mga trend sa ekonomiya. Sa panahon ng mababang interest rates, maaaring makapagbigay ng mas magandang kita ang stocks at real estate kumpara sa bonds.

Pangangailangang Mag-diversify: Siguraduhing hindi masyadong dumedepende ang portfolio mo sa iisang klase ng asset. Maaaring bumaba ang risk kapag iba-iba ang assets at gaganda ang tyansa na maabot ang tuloy-tuloy na kita.

Ganito ka makakasabak sa iba’t-ibang klase ng assets: 

Stocks at Bonds: Pwede kang bumili ng indibidwal na stocks at bonds sa pamamagitan ng isang brokerage account. Para mas ma-diversify ito, pwede mong subukan ang mutual funds at ETFs, kung saan pinagsasama-sama ang iba’t-ibang stocks at bonds.

Real Estate: Direktang mag-invest sa mga paupahan o Real Estate Investment Trusts (REITs), na nagbibigay-daan para makapag-invest ka sa real estate nang hindi pinapamahalaan ang mismong ari-arian.

Mga Alternatibong Investment: Magka-access dito sa pamamagitan ng mga espesyal na funds o platform. Mag-trade ng mga commodity sa pamamagitan ng futures contracts o bumili ng crypto sa mga digital exchange.

Robo-Advisors: Sa pamamagitan nitong mga awtomatikong serbisyo, magagawa at mahahawakan mo ang naka-diversify na portfolio batay sa iyong kakayaning risk at layunin.

Mga Edukasyonal na Resources: Maging mas magaling sa pamamagitan ng pag-enrol sa mga klase sa pag-trade ng stocks, currency, o iba pang pinansyal na kurso. Kapag mas marami kang alam, mas mabuti mong matatahak ang landas mo sa pag-iinvest.

Mahalaga para sa bawat investor ang pag-unawa sa mga klase ng assets. Nakakatulong sa pagbaba ng risk at pagpapataas ng kita ang pag-diversify sa iba’t-ibang equity, fixed income, real estate, at alternatibong investment. Kapag pumipili ng klase ng asset, isaalang-alang ang kakayanin mong risk, tagal ng investment, pinansyal na layunin, kondisyon ng market, at pangangailangan na mag-diversify. Sa tulong ng tamang kaalaman at istratehiya, matatahak mo nang may kumpiyansa ang financial markets at maaabot mo ang iyong layunin sa pag-iinvest. Kahit na nagsisimula ka pa lang o isa nang beteranong investor, kritikal na hakbang tungo sa tagumpay ang pagiging bihasa sa iba’t-ibang klase ng assets.

Sumabak na at samantalahin ang karanasang ito!